कोल्हापुरी मिसळ - एक अनुभव!

बैचलर असताना आम्ही सर्व रूममेट्स  पुण्याहून कोल्हापूरला फिरायला गेलो. रात्री पांढऱ्या-तांबड्या रस्यावर चांगलाच ताव मारला आणी मस्त गप्पा गोंधळ करत कधी झोपलो ते आठवत नाही. सकाळी उठल्यावर चहापान वगैरे उरकून झाल्यावर नाश्ता काय करायचा याविषयी एकमत होईना. आम्हा सगळ्या मंडळीना कोल्हापुरी मिसळबद्दल प्रचंड उत्सुकता होतीच त्यामुळे ती कुठे चांगली मिळते ते शोधून काढले.  महाराष्ट्रात कोल्हापुरी म्हणजे तिखट, लाल भडक मिसळ, अशी समजूत आहे. साहजिकच आम्हीही तेच समजून "फडतरे मिसळ" या कोल्हापुरातील मिसळकरता प्रसिद्ध अशा ठिकाणी रांगेत उभे राहून मिसळ समोर येण्याची वाट पाहत बसलो. जेव्हा मिसळ आली तेव्हा आम्ही आश्चर्यचकित झालो कारण ती तांबडी तरीदार तर मुळीच नव्हती आणी तिखटहि नव्हती. माझ्या इतर मित्रांना ती अजिबात आवडली नाही. मला बेडेकरांची मिसळ खाण्याची "सवय" असल्याने मी ती खाल्ली. बाहेर आल्यावर आम्ही एका कोल्हापुरी माणसास याबद्दल विचारले असता तो म्हणाला कोल्हापुरी म्हणजे तिखट हा एक गैरसमज आहे कोल्हापुरी मसाल्याची एक वेगळी अशी चव आहे. ते ऐकून आम्ही मनोमन म्हणालो आपली नाशिकची मिसळच लय भारी बुवा!

हिरवी चटणी- हिरवी मिरची लसूण ठेचा

हिरवी मिरची लसूण ठेचा/चटणी

साहित्य: २-4 लवंगी मिरच्या (कमी तिखट सुद्धा वापरू शकता), ८-१० ताज्या लसणाच्या पाकळ्या. मीठ व लिंबू.

कृती: प्रथम मिरच्या धुवून, लसूण सोलून, व १ लिंबाचा रस काढून ठेवावा.

हि चटणी किंवा ठेचा माझ्या मते पाट्यावर वाटला तरच सुरेख होतो. तुमच्याकडे पाटा वरवंटा नसेल तर तुम्ही एखादा मोठा व एक लहान दगडही वापरू शकता (परंतु तो आधी स्वच्छ धुवून घ्या.) मिक्सर वापरू नका अन्यथा अपेक्षित चव येणार नाही. 

मिरची व लसूण एकत्र साधारण ३ मिनिटे वाटून घेऊन त्यात लिंबाचा रस व मीठ चवीनुसार घालावे.  आणी अप्रतिम ठेच्याचा बाजरीच्या अथवा ज्वारीच्या भाकरीबरोबर आस्वाद घ्यावा. झुणका व कांदा  सोबत असल्यास दुग्धशर्करा योग समजून पाककर्त्यास (किंवा कर्तिस) मनोमन धन्यवाद द्यावा. .